Boy & The Golden Bird

ބޮޑުސާދާގަރުގެ ރުޅިގަނޑު ފެނިފައި ގަންނާކުރެއްވި ބިރުން އެރޭ އެގޭދޮށަށް ދާކަށް އިބުރާހީމަކަށް ނުކެރުނެވެ. އޭނާ ބަނޑުހައިވެގެން އެއްގެއެއްގެ ވަޅުން ފެންބޮއިގެން މަދުގަހުގައި ހުރި ޅަމަދު ކައިގެން އެރޭ އެހެން ގެއެއްގެ އަސްކަނިދަށުގައި ނިދަން މަސައްކަތްކުރިއެވެ.

ނަސީބު ދިމާކުރި ގޮތުން އެރެއަކު ވާރޭއެއް ނުވެހެއެވެ. އެހެންނަމަވެސް ބަނޑުހައިވެފައިވާލެއް ބޮޑުކަމުން އިބުރާހީމު ގާތަކަށް އެއްގޮތަކަށްވެސް  ނިންޖެއް ނައެވެ. އެހެން އޮއްވައި އިރުއަރަން ކައިރިވެއްޖެއެވެ.

މިއަދުވެސް ގިނަ ކާށިތަކެއް ލިބިދާނެ ކަމުގެ އުއްމީދުގައި އިބުރާހީމު ވަލަށް ދިޔައެވެ. އަދި ގިނަ ކާއްޓާއި ދަރު އެއްކޮއްގެން ގޭގެއަށް ގެންގޮސްދޭން ފަށައިފިއެވެ. އެންމެ ފައިދާވީ ދަރުވިއްކައިގެއިންނެވެ. އެހެންކަމުން އެރޭ އިބުރާހީމަށް ބަނޑުފުރެންދެން ރަނގަޅަށް ކާންލިބުނެވެ.

ބަނޑު ފުރެންދެން ކެއުމަކީ ނިދިއަންނަލެއް އަވަސްވާކަމެއްކަމުން އިބުރާހީމަށްވެސް ވީ ހަމަ އެހެންނެވެ. އެތަނުން އެންމެ ކައިރިން ފެނުނު އަށްޓަށް އަރާ އޮށޯތްތަނާ އޭނާއަށް ނިދިއްޖެއެވެ.

އަނެއްދުވަހު އޭނާއަށް ހޭލެވުނީ އިރުއަރައިގެން ވަރަށް ގިނައިރުވި ފަހުންނެވެ. އަލިގަދަވެގެން ލޯހުޅުވާލެވުނު އިރު ކުދިންތައް ބައިހަދާފައި އެދުރުދައިތަގެއަށް ދަނީއެވެ. އެކުދިން ހެމުން ސަކަރާތްޖަހަމުން ގޮސް ގެއްލެންދެން އިބުރާހީމު ބަލަން އިނެވެ. ވަލަށް ދާންޖެހޭނެކަން އޭނާއަށް ހަނދާންވީ އިރުކޮޅަކުންނެވެ.

އޭނާ ދުވެފައި ވަލަށް ދިޔައިރު މީހުން ކާށްޓާއި ދަރު ބޮނޑިބޮނޑި ހިފައިގެން ނިކުންނަނީއެވެ. ނަމަވެސް ހިތްވަރު އެލުވާނުލާ އޭނާ ވަލުތެރެއަށް ވަނެވެ. ވަރަށް ގިނައިރު ވަންދެން ތަންތަން ބެލިއެވެ. އެހެންނަމަވެސް  ހޮވާނެހަމަ އެއްވެސް އެއްޗެއް ނުފެނުނެވެ.

އިބުރާހީމު ދެރަވި ވަރުން އެތަނުން ކާނިގަހެއްގެ ބުޑުގައި އިށީނދެ ރޯންފަށައިފިއެވެ. މިރޭ ކާނެ އެއްޗެއް ނުލިބޭނެކަން ވިސްނުނީމާ އަދި މާބޮޑަށް ހިތުގައި ޖެހުނެވެ. އަދި ދެންދުވަހަކުވެސް ގިނަ ކާށި ހޮވިއްޖެއްޔާ އޭނާ އެއިން ކޮންމެވެސް ފައިދާ ހުރިކަމެއް ކުރަން އަޒުމް ކަނޑައެޅިއެވެ.

އޭނާ މަޑުމަޑުން ތެދުވެގެން ވަލުން ނުކުންނަން ދިޔަތަނާ ކުއްލިއަކަށް ބާރު އަޑެއް ކިޔައިފައި މުޑިކާށްޓެއް އޭނާހުރި ދިމާއަށް ވެއްޓިއްޖެއެވެ. އެވަރަށް މުޑިލައި ކުރިލައިފައި ވާ ކާށްޓަކީ އެއީ އެއްވެސް ރުކަކުން ވެއްޓޭނެ އެއްޗެއް ނޫންކަން އޭނާއަށްވެސް އެނގެއެވެ. އޭނާ އެކާށި ނަގައިފައި ވަށައިގެން ހޯދައި ބަލައިލިއެވެ. އެތާނގައި އެއްވެސް މީހެއް ފެންނަން ނެތުމުން މުޑިކާށި ހިފައިގެން އޭނާ ދިޔައީއެވެ. 

އެރޭ އެމުޑިކާށި ކާން އިންދައި އެތަނަށް ކަތީބުދައިތަ އަތުވެއްޖެއެވެ. އަދި އިބުރާހީމަށް ބަތްބޯތަށްޓެއް ދިނުމަށްފަހު އެއީ ކުރީ ދުވަހުގެ ބަދަލުގައި ދިންއެއްޗެކޭ ބުނެލިއެވެ. އިބުރާހީމު ވަރަށް ޝުކުރުކޮށްފައި އެރޭވެސް ރަނގަޅަށް ކައިގެން ނިދައިފިއެވެ.

ކަންވީ ހަމަ ކުރީދުވަހު ވެސް ވީފަދައިންނެވެ. އޭނާއަށް ހޭލެވުނީ ވަރަށް ލަސްވިފަހުންނެވެ.  އެހެންކަމުން ވަލަށްގޮސްގެން މިއަދުވެސް އެއްވެސް އެއްޗެއް ނުލިބޭނެކަން އެނގޭތީ އޭނާ ވަލަށް ދިޔުމުގެ ބަދަލުގައި ރަށުގެ އެހެން ކުދިންނާއެކު މޫދަށްދިޔައެވެ.

މެންދުރު ކާގަޑި ޖެހިގެން އެކުދިން މޫދުން އަރައިގެން ގެއާ ދިމާއަށް ދުވަން ފެށުމުން އިބުރާހީމު ވަލާދިމާއަށް ދިޔައެވެ. ވަލުތެރޭގައި ހުންނަ ބޮޑުމަދު ގަހުން މަދުލިބޭތޯ ބަލައިލަންވެގެންނެވެ.

އިބުރާހީމު ވަލަށް ވަދެގެން ވަކިހިސާބަކަށް ދިޔަތަނާ އެއްކަލަ ރަންދޫނީގެ އަޑު އިވެން ފަށައިފިއެވެ. އެއަޑު ޖެހުމުން އިބުރާހީމު އެއަޑު އަންނަ ދިމާއަށް ހިނގައިގަތެވެ. ވަރަށް ގިނައިރުވަންދެން ހޯދުމުންވެސް އެދޫނި ފެންނަގޮތެއް ނުވިއެވެ.

އޭނާ އެއްކަލަ ކަށިކެޔޮ ފީނިތަކުގެ ތެރެއިންލާފައި، އެދެކަފި ރުއްތައްކައިރިއަށް ދިޔައިރު އެތާގައި ފުންޏަކަށް ވަަރަށް ބައިވަރު ކާށި އެއްކޮށްފައި ހުއްޓައި ފެނިއްޖެއެވެ. އެއީ ކާކު އެއްކޮށްފައި ހުރި ކާށިތަކެއްކަން ނޭނގޭތީ އިބުރާހީމު ދުރުގައި ބަލަން ހުއްޓެވެ. ނަމަވެސް ހަވީރުވުމާ ގާތްވިއިރުވެސް އެކާށިތައްބަލައި އެއްވެސް މީހެއް ނައެވެ. އެހެންކަމުން އެއީ އެއްވެސް މީހަކު އެއްކޮށްފައި ހުރި ކާށިތަކެއް ނޫންކަން އިބުރާހީމަށް ވިސްނުނެވެ.

އޭނާ އަށް ގެންދެވޭނެވަރަށް ކާށި ނަގައިގެން ވަލުން ނިކުންނަން ދިޔައިރު އަނެއްކާވެސް އެއްކަލަ ދޫނީގެ ރީތި އަޑު އިވުނެވެ. އެވަގުތު އެއީ އެދޫނި އިބްރާހީމަށް ދިން އެއްޗެއްކަން އޭނާއަށް ވިސްނުނެވެ.

އިބުރާހީމު އުފަލުން އަވަހަށް ރަށުތެރެއަށް ދިޔައެވެ. އެހެންނަމަވެސް މިފަހަރު އެކާށިތައް ހިފައިގެން އޭނާ ދިޔައީ އެދުރުދައިތަގެއަށެވެ. އަދި ކާށީގެ ބަދަލުގައި އެދުރުދައިތަ އޭނާއަށްވެސް ކިޔަވައިދޭން އެއްބަސްކުރުވިއެވެ.

ފަގީރުކޮއި ކިޔަވަން ބޭނުންވާކަން އެނގުމުން އެދުރުދައިތަ ވަރަށް ހައިރާންވިއެވެ. އެހެންނަމަވެސް އިބުރާހީމު ނުހަނު އަދަބުވެރިކަމާއެކު ވާހަކަ ދެއްކުމުން އެކަމަށް އެދުރުދައިތަ އެއްބަސް ވިއެވެ.