...އެހެން ނޫންނަމަ
ރަޝާދު އެނދުމަތީގައި ވިސްނަން އޮތެވެ. މޫނުމަތީގައި އެއްއަތް ބާއްވައިލައިގެން އޭނާ މަޑުމަޑުން އޮތެއް ކަމަކު އޭނާގެ ސިކުނޑީގެ ދައުރުކުރަމުންދާ ޚިޔާލުތައް އެންމެ ހިނދުކޮޅަކަށްވެސް މަޑެއްނުވެއެވެ. ނުތަނަވަސްކަމާއެކު އޭނާ އޮތް ފަރާތް ނޫން އަނެއް ފަރާތަށް އެނބުރިލިއެވެ.
އޭނާގެ ސިކުނޑީގައި އުފެދެމުން ދިޔަޚިޔާލުތައް އަމާޒުވެފައިވަނީ އޭނާގެ ދަރިފުޅާއި މެދުއެވެ. އޭނާގެ ދިރިއުޅުން ބައްޓަންވެގެން އެއަންނަ ގޮތާއި މެދުއެވެ. އޭނާގެ ދިރިއުޅުން ފެށުނު ދުވަހާއި މެދުއެވެ. ވަރަށް އާދައިގެ ދިރިއުޅުމެއް އުޅެމުން ދިޔަ ދުވަސްތަކުގައި އޭނާގެ ދިރިއުޅުމަށް ނަފީސާ އައި ދުވަހާއި މެދުއެވެ.
—-
ރަޝާދުއަކީ އަބަދުވެސް ތަންކޮޅެއް ތަފާތު މީހެކެވެ. ރީތި މީހެކެވެ. އެރަށުގެ ގިނަ އަންހެންކުދިން ހިތްކިޔާ މީހެކެވެ. އެއަތޮޅަށްވެސް މަޝްހޫރު މީހެކެވެ. އޭނާގެ ބޭރުފުށުން އެފެންނަ ރީތިކަމުގެ އިތުރުން އޭނާއަކީ އަޚްލާގު ރަނގަޅު، އެހެން މީހުންނަށް ހިތްހެޔޮ، އުފާވެރި މިޒާޖެއްގެ މީހެއްވެސް މެއެވެ.
އެހެންކަމުން ކަންނޭނގެއެވެ. އޭނާގެ މަންމައަށް އަތްގާތް ކޮށްދީ، ގޭތެރޭގެ މަސައްކަތް ކޮށްދޭން އަންނަ އަންހެން ކުދިން ވަރަށް ގިނައެވެ. ޢީދެއް ވަޅު ޢީދެއް އައިކަމުގައިވިޔަސް އެމީހުންގެ އަމިއްލަ ގޭގެ މަސައްކަތަށްވުރެ އިސްކަމެއް ދޭހެން ހީވަނީ ބޮޑުކެޔޮޅުގޭ ރަޝާދުގެ މަންމައަށް އެހީވުމަށެވެ.
އޭނާގެ ވަށައިގެން އަންހެންކުދިން އެނބުރެމުން ދިޔަކަމުގައިވީ ނަމަވެސް ރަޝާދުގެ ހިތުގައި ބިންވަޅުނެގޭވަރުގެ އެއްވެސް އަންހެންކުއްޖަކާއި ދިމައެއްނުވެއެވެ. އޭނާގެ ހުވަފެންތަކުގެ ރާނީއާއި އަޅާބަލާއިރު އެހެން ކޮންމެ ކުއްޖެއްވެސް ފެންނަނީ ފަނޑު ހިޔަންޏެއްގެ ސިފައިގައެވެ. އެރާނީއަކީ ކާކު ކަމެއް ޚުދު އޭނާއަކަށްވެސް ނޭނގެއެވެ. ނަމަވެސް އޭނާގެ އަޒުމްގައި ޔަގީންކަމާއެކު ގާއިމްވެގެން ހުއްޓެވެ. އެހެން ކަމުން އޭނާ އުންމީދުކުރަމުންދާ ފަދަ އަންހެންކުއްޖާ އަދި ފެންނާނެއެވެ. އެދުވަހަކުން އޭނާގެ ދިރިއުޅުން ފުރިހަމަވެގެންދާނެއެވެ.
އޭނާގެ ޅަޒުވާންކަމުގެ ދުވަސްތައް ފާއިތުވަމުންދާ ވަރަކަށް އަންހެންކުދިންގެ ހަނައެޅުންތައް އޭނާއަށް އަމާޒުވަމުން ދިޔައެވެ. އަދި ޚާއްސަކޮށް އެރަށު ކުޑަކަތީބުގޭ ފަރީޝާ އެތައްފަހަރަކު އޭނާއަށް ދައުވަތު ދެމުން ދިޔައެވެ. ފަރީޝާއަކީ ރަނގަޅު ކުއްޖެއް ނަމަވެސް އޭނާގެ އާއިލާއަކީ ފަންޑިތަ ސިހުރު ހަދާ ބައެއްގެ ގޮތުގައި އެރަށުގައި މަޝްހޫރު ބައެކެވެ. އެހެންކަމުން އެކަމާއި ރަޝާދުގެ މަންމަ އެއްގޮތަކަށްވެސް ގަބޫލު ނޫންކަން އޭނާއަށް އެނގެއެވެ. އެކަމުގެ އުނދަގޫ ބޮޑުވެގެން އޭނާގެ މަންމަ އެތައް އާދޭހެއް ކުރިއެވެ. ދުވަސްކޮޅަކަށް ނަމަވެސް ރަށުން ބޭރަށް ދިޔުމަށް އެދުނެވެ.
އޭނާގެ ބައްޕައަކީ ކެޔޮޅުކަމުގައި ވަރަށް މަޝްހޫރު މީހެކެވެ. އެހެންނަމަވެސް ރަޝާދުއަކީ އެރަށުގެ އެހެން މީހުން ފަދައިން މަހަށް ދާހިތްވާ މީހެއް ނޫނެވެ. ދަނޑުވެރިކަން ކުރާހިތްވާ މީހެއްނޫނެވެ. އެއްވެސް މަސައްކަތެއްގައި ދެމިހުރުމުގެ ހިތްވަރެއް ރަޝާދުގެ ކިބައިގައި ނުހުންނަ ކަހަލައެވެ. އެހެންކަމުން ބައްޕައާއި އެކު އެކި ދަތުރުތަކުގައި ރަޝާދު ދަނީ މަދުފަހަރަކުއެވެ.
އޭނާ ހަމައެކަނި ޝައުގުވެރިކަން ހުންނަނީ މާލެދާ ދަތުރުތަކަށެވެ. އެއިން ކޮންމެ ދަތުރެއްގައި އޭނާ މާލެއެރުމާއެކު މާލޭގެ ހަލަބޮލިކަން އޭނާއަށް ގޮވާކަހަލައެވެ. އެ އަވަސް ދުވެއްޔައް ދިރިއުޅުން ބައްޓަން ކުރަން އޭނާ ބޭނުންވެއެވެ. އެހެންނަމަވެސް ބޮޑުކެޔޮޅަކަށް މާލެއެއް ނުވަތަ މާލޭގެ ދިރިއުޅުމެއް ކަމަކު ނުދެއެވެ. އެކަމަކު ރަޝާދުގެ ހަމަ އެކަނި އުންމީދަކީ މާލޭގައި ވަޒަންވެރި ވުމެވެ. އެހެންކަމުން ކޮންމެ ފަހަރަކުވެސް މާލެދާ ދަތުރުތަކުގައި އޭނާ ބައްޕައަށް އަތްގާތްކޮށްދޭން ދެއެވެ.
އެގޮތުން އެފަހަރުވެސް އޭނާ ބައްޕައާއި އެކު މުދާގަތުމަށް ދިޔަ ދޯނިން އޭނާ މާލެއައީ، އެދަތުރުގެ ސަބަބުން އޭނާގެ މުޅި ދިރިއުޅުން ބަދަލުވާނެ ކަމަކަށް ކުޑަވެސް ޝައްކެއްވެސް ކުރެވިފައިނުވާތީއެވެ.
ވިޔަފާރިކޮށްގެން ދޯންޏަށް އަރުވާނެ މުދާތައް ޕިކަޕަށް ލުމަށްފަހު ހޮޓަލަށް ދިޔައީ ހަވީރުގެ ސައި ބޮވައިގަނެގެންނެވެ. އޭނާގޮސް ހޮޓާކުރިމަތީގައި ހުއްޓުމާއެކު ޖެހިގެން ހުރި އިމާރާތުގެ ތެރެއިން ނިކުމެގެން އައި އަންހެންކުއްޖާއާއި ދިމާއަށް އޭނާގެ ނަޒަރު ހުއްޓުނެވެ. އެއާއެކު އޭނާގެ ދެލޯބޮޑުވެގެން ދިޔައެވެ. ހަމަޔަގީނުންވެސް އެއީ މިހާތަނަށް އޭނާއަށް ފެނުނު އެންމެ ރީތިކުއްޖާއެވެ.
އެރީތި މޫނާއި ޒުވާންކަމުން ފުރިފައިވާ ރީތި ހަށިގަނޑެކެވެ. ވައިގެ ތެރެއަށް ވިހުރެމުންދާ ކަޅު ދިގު އިސްތަށިގަނޑުގެ ހަރަކާތްތައް އެހާމެ ހިތްގައިމެވެ. އޭނާގެ ތޫނު ކަޅިރަވައިގެ ޖާދޫ، ދުރުގައި ހުރިއިރުވެސް ރަޝާދަށް އިޚްސާސްކުރެވުނެވެ. އެއަންހެންކުއްޖާގެ ބެލުން އޭނާއަށް އަމާޒުވިއެވެ. އަދި ހަމަ އެހިނދުކޮޅުގެ ތެރޭގައި މޫނު އަނބުރާލުމަށްފަހު އަނެއްކޮޅަށް ހިނގައިގަތެވެ.
ރަޝާދުއަށް އެސްފިޔަ ޖަހާލަންވެސް ހަނދާން ނެތިގެން ދިޔަކަހަލައެވެ. އޭނާއަށް ބޭއިޚްތިޔާރުގައި އެއަންހެންކުއްޖާގެ ފަހަތުން ހިނގައިގަނެވުނެވެ. ނަމަވެސް ދެތިން ފިޔަވަޅު އަޅާލުމާއެކު އޭނާއަށް ހޭވެރިކަން ވެއްޖެއެވެ. އޭނާ ކުޑަކޮށް ބޯހަލުވާލުމަށްފަހު ހޮޓަލާއި ދިމާއަށް އެނބުރުނެވެ.
އެދަތުރު އޭނާ މާލޭގައި ހޭދަކުރި ދެ ދުވަހު ވެސް އެއަންހެންކުއްޖާގެ ހަނދާންތައް ހުއްޓާނުލާ އޭނާއަށް އުނދަގޫކުރަމުން ދިޔައެވެ. ކޮންމެ ދުވަހަކުވެސް ރަޝާދު އޭނާ ބަލާލުމުގެ ނިޔަތުގައި އެހޮޓާކައިރިއަށް ދެއެވެ. އަދި ކޮންމެ ދުވަހަކުވެސް އެކުއްޖާ އެއިމާރާތުގެ ތެރެއިން ނިކުމެ އަނެއް ފަރާތަށް އެނބުރި ހިނގައިދެއެވެ. އެއީ ރަޝާދުގެ ހަމައެކަނި ވަޒީފާ ކަމުގައި ވެއްޖެއެވެ. ދެން ދަތުރު މަތީގައި ކުރާނެ އެއްވެސް ކަމެއް އޭނާއަކަށް ހަނދާނެއް ނުވެއެވެ.
އެއަންހެންކުއްޖާއަކީ ޝައްކެއް ނެތްގޮތުގައި ފޯރުންތެރި ކުއްޖެކެވެ. އޭނާ ލާހެދުންތަކުންވެސް ރަޝާދުއަށް އެކަން ޔަޤީންވިއެވެ. އެހެންކަމުން އެފަދަ ކުއްޖަކު އޭނާއާއި ދިމާއަށް ބަލާލަންވެސް ބޭނުން ނުވާނެކަން އޭނާއަށް ޔަޤީންވިއެވެ.
އޭނާ ރަށަށް އެނބުރި ދިޔައީ މާޔޫސްވެފައިވާ ހިތަކާއެކުއެވެ. އަދި އެއާއެކު ރަށުގެ އެއްވެސް ކަމެއް އޭނާއަކަށް ކަމަކު ނުދެއެވެ. އޭނާގެ ހަނދާނުން ފޮހެވިގެންނުދާނެ އެއަންހެންކުއްޖާ ރެޔާއި ދުވާލު އޭނާގެ ހިތުގެ ދޮރުގައި ޓަކިޖަހަމުން ގެންދިޔައެވެ. އޭނާ އެއަޑަށް ބީރުކަންފަތެއް ދެވޭތޯ މަސައްކަތްކުރިއެވެ. އެހެންނަމަވެސް ކާމިޔާބުވާ ގޮތެއް ނުވިއެވެ. ދެން އައިދަތުރު އޭނާ މާލެ ދިޔައީ ދެޚިޔާލެއްގެ މަތީގައި ހުރެގެންނެވެ. އެއަންހެންކުއްޖާ ފެނިއްޖެނަމަ އޭނާގެ ހިތުގެ ހާލު އެއަންހެންކުއްޖާއަށް ބަޔާންކުރުމުގެ ނިޔަތުގައެވެ. ނަތީޖާ ކޮންމެ ގޮތަކަށް ނިކުތްކަމުގައިވިޔަސް ހެޔޮކަމަށެވެ.
ކޮންމެ ދުވަހަކުވެސް އޭނާ އެއިމާރާތް ދޮށަށް ދެއެވެ. ހޮޓަލުގެ ކުރިމަތީގައި ގިނައިރުތަކެއް ހޭދަކުރެއެވެ. އޭނާގެ ހިތުގެ ރަނިކަމަނާގެ ހިޔަނިވިޔަސް ފެނިލާތޯއެވެ. އަދި ކޮންމެ ދުވަހަކުވެސް އޭނާ ދާންޖެހެނީ ގޮތްހުސްވެ، މާޔޫސްވެގެންނެވެ. އެހެންކަމުން އޭނާ ދެން ރަށަށް އެނބުރި ދިޔައީ އެއަންހެންކުއްޖާ މަތިން އެއްކޮށް ހަނދާން ނައްތާލަން ހިތަށް ވިސްނައިދެމުންނެވެ.
އެތައް މަސްތަކެއް ފާއިތުވެއްޖެއެވެ. މާލެ ދާ ކޮންމެ ދަތުރެެއް އޭނަ ނިންމާލަނީ އުދާސްކަންމަތީގައެވެ. ދެން އިތުރު ގޮތެއް ނެތުމުން އޭނާ އެޚިޔާލުތަކާއި ދުރުވާން އަޒުމު ކަނޑައެޅިއެވެ. އެހެންކަމުން ރަޝާދުގެ ދިރިއުޅުން ހަމައަކަށް އެޅުވޭތޯ އޭނާ މަސައްކަތްކުރިއެވެ. ޒަވާޖީ ހަޔާތެއް ފެށުމުން، އޭނާގެ ހިތުގައި އެ ބިންވަޅު ނެގިފައިވާ ސޫރަ ފޮހެވިގެންދާނެ ކަމަށް އޭނާ އުއްމީދުކުރިއެވެ. އެހެންކަމުން އޭނާގެ މަންމަމެން ގެ ނުރުހުމުގައިވެސް ފަރީޝާއާއި ކައިވެނިކުރަން އޭނާ ނިންމިއެވެ.
އެއީ ހިތުގެ އަޑިން ނިންމި ނިންމުމެއް ނޫންކަން އޭނާއަށް ވިސްނުނީ ބައްޕައާއިއެކު މާލެ ދިޔަދަތުރުގައިއެވެ. ވިއްސާރަ މޫސުމުގައި ދަތުރު ނުކުރާން ފަރީޝާ އެދެމުން ދިޔަ ނަމަވެސް ރަޝާދު އެދަތުރު ދިޔައީ އޭގެ ފަހުން މާލެ ނާރާނެ ކަމަށް ވައުދުވަމުންނެވެ.
މާލެފަޅަށް ޖެއްސި އެދުވަހަކީ ވަރަށް ވިއްސާރަ، ވިލާ ބޯ، ބަނަ ދުވަހެކެވެ. އެކަމާއި މާބޮޑު ފަރުވާލެއް ނެތެވެ. އޭނާގެ ހިތުގެ އެދެމަކަށް ފުރަގަހެއް ނުދެވުނެވެ. ރަޝާދު ހޮޓަލުގެ އަސްކަނި ދަށުގައި މަޑުކޮށްލައިގެން އިންތިޒާރުކުރަމުން ދިޔައެވެ. އެއަންހެންކުއްޖާ ފެނޭތޯއެވެ. އޭނާ އެފަދަ އިންތިޒާރެއް ކުރަންވީ ކީއްވެގެން ކަމެއް ނޭނގެއެވެ. އެހުރިހާ ދުވަހަކު ނުފެނި ހުރުމަށްފަހު އެދުވަހު އެއަންހެންކުއްޖާއާއި ދިމާވާނެ ކަމުގެ ޔަގީންކަން އޭނާއަށް ލިބެމުން ދިޔައީ ކީއްވެގެންކަމެއް އޭނާއަކަށް ނޭނގެއެވެ.
އެހެން ހުއްޓައި އެއަންހެންކުއްޖާ ކުޑައަކާއި ނިވާވެގެން ހަލުވި ހިނގުމެއްގައި އަންނަތަން ފެނިއްޖެއެވެ. ރަޝާދު ހަށިގަނޑު ތެދުކޮށްލިއެވެ. އަދި ވަރަށް ފަރުވާވެ ހުއްޓައި އެއަންހެންކުއްޖާ އޭނާއާއި އަރާ ހަމަވިއެވެ.
” އޭނ. ކޮންނަމެއްތަ ކިޔަނީ؟” ރަޝާދުގެ އަޑު ނިކުތީ ފިސްވެގެންނެވެ.
ރަށުގައި މިފަދަކަމަކާއި ދުވަހަކުވެސް ކުރިމަތި ލާކަށް ނުޖެހެއެވެ. އޭނާގެ ސޫރައާއި ހަރަކާތްތަކަކީ އަންހެންކުދިންނަށް ހިތްގައިމު، އެމީހުންގެ ހިތްތަކާއި ކުޅެލާ ސޫރަކެވެ. އެހެންކަމުން އޭނާއަށް އެވަސީލަތްތައް ރަނގަޅަށް ބޭނުންކުރަން އިނގޭ ކަމަށް އޭނާއަށް އަބަދުވެސް ހީކުރެވެއެވެ. އެހެންނަމަވެސް އޭނާގެ ދިރިއުޅުމުގެ އެންމެ މުހިއްމު ދުވަހު އެވަސީލަތްތައް އޭނާގެ ކިބައިން ބީވެގެން ދިޔަކަހަލައެވެ.
އެއަންހެންކުއްޖާ ކުއްލިއަކަށް ބަލާލިއެވެ. އެވަގުތު އޭނާގެ ދެލޯ ބޮޑުވެގެން ދިޔައެވެ. އަދި ހަމައެހިނދުކޮޅު އޭނާގެ ހަރަކާތްތައް އަވަސްވެ، ހިނގުން ބާރުކޮށްލިއެވެ.
ރަޝާދު ހައިރާންކަމާއެކު ބަލަން ހުއްޓައި އެއަންހެންކުއްޖާ އޭނާ ހުރަސްކޮށް ގޮސް ގޯޅި ލަނބާލަނީއެވެ. ރަޝާދުގެ ހިތްވަރު އެލުނެވެ. އޭނާގެ އެދުވަހުގެ އުންމީދުތައް ވެހެމުންދިޔަ ވާރޭގެ ކަނިތަކާއެކު ބިންމައްޗަށް ފޭދިގެންދާކަމުގެ އިޚްސާސް ކުރެވުނެވެ.
ނޫނެކެވެ. އެހެނެއް ނުވާނެއެވެ. އަދި އެހާ އަވަހަށް ހިތްވަރު އެލުވާލާކަށް ނުވާނެއެވެ. ރަޝާދުގެ ހިތް ކުއްލިއަކަށް ހަޅޭއްލަވައިގަތެވެ. އޭނާގެ ހަށިގަނޑު ތެދުކޮށްލުމަށްފަހު ހިނގައިގަތެވެ. އެވަގުތު އޭނާއަށް ވެހެމުން ދިޔަވާރޭގެ ފިނިކަންވެސް އިޙްސާސް ނުވާކަހަލައެވެ. އޭނާ ގޯޅިއެޅިއިރު އެއަންހެންކުއްޖާ ފެންނާކަށް ނެތެވެ. ރަޝާދު ހާސްކަމާއެކު ބަލަން ހުއްޓެވެ. އޭނާ ދިޔައީ ކޮންތާކަށް ކަމެއްވެސް ނޭނގުނެވެ. އެއަންހެންކުއްޖާ އެދިޔައީ އޭނާއާއިއެކު ރަޝާދުގެ ހުރިހާ އުއްމީދެއް ހިފައިގެންނެވެ. ރަޝާދު ވަރުބަލި ގޮތަކަށް ގޮސް އަނެއްކާވެސް ގެއެއްގެ އަސްކަނި ދޮށުގައި މަޑުކޮށްލިއެވެ.
ކުއްލިއަކަށް އޭނާގެ ކައިރިއަށް މަޑުކޮށްލީ އެއަންހެންކުއްޖާއެވެ. އޭނާގެ ހުވަފެންތަކުގެ މަލަކާއެވެ.
ކުރިންސުރެ ދެކެމުން އައި ހުވަފެންތައް ހަގީގަތަކަށް ވުމުން ރަޝާދުއަށް ބުނާނެ އެއްޗެއް ނުވިސްނުނެވެ. އޭނާގެ ދުލުގައި ތަޅު އެޅިއްޖެއެވެ. ކަޅިޖަހާނުލައި އޭނާ ބަލަމުން ދިޔައެވެ. އެހިނދު މުޅި ދުނިޔެވެސް ވެހެމުން ދިޔަ ވާރޭގެ ތެރެއަށް ފޭދިގެން ހިނގައްޖެއެވެ. ރަޝާދުގެ ޝައުޤުވެރިކަން ބޮޑުކަމުން، އެއަންހެންކުއްޖާވެސް ކަޅިޖަހާނުލާ އޭނާއާއި ދިމާއަށް ބަލަމުން ދާކަންފާހަގައެއްވެސް ނުކުރެވުނެވެ.
ދުރުން ފެންނައިރަށްވުރެ ވެސް އެއަންހެންކުއްޖާ މާރިއްޗެވެ. މާފުރިހަމައެވެ. ރަޝާދުގެ ސިކުނޑި މަސައްކަތްކުރުން ހުއްޓާލާފައި ތަކުރާރުކޮށް ބުނަމުން ދިޔައީ މިވާހަކައެވެ.
ރަޝާދުގެ ނަޒަރު އެއަންހެންކުއްޖާގެ ފައިގެ ނިވާބޮނޑިން ފެށިގެން ބޮލާހަމައަށް އައި އިރު އޭނާގެ ތުންފަތްމައްޗަށް ވެރިވެފައިވާ ހިނިތުންވުން ފުންވެގެން ދިޔައެވެ. އެހިނދު އެމީހުންގެ ހަތަރުކަޅި ބައްދަލުވިއެވެ. އަދި ކުރިން ހިޔަނިވަމުން ދިޔަ ދުނިޔޭގެ ހުރިހާ އަލާމަތްތަކެއް ސިކުނޑިން ފޮހެވިގެން ދިޔައެވެ.
” ތީނައަށް ކިޔަނީ ކޮން ނަމެއްތަ؟ “
” އޭނ؟! ” އެއީ ރަޝާދުގެ އަޑެއް ނޫނެވެ. ރަޝާދު ސިއްސައިގެން ދިޔައެވެ.
” ނަން މިއަހާލީ.” އެއަންހެންކުއްޖާގެ މޫނުމަތިން ލަދުވެތިކަމުގެ ރަތްކުލަ ފާޅުވެލިއެވެ.
” ރަޝާދު.”
ރަޝާދުއަށް ކުރިއަށް ޖެހިލެވުނުއެވެ.
އެންމެ ފަހުން އޭނާއަށް އެއަންހެންކުއްޖާގެ ނަން އެނގިއްޖެއެވެ. އެރީތިމޫނާއެކު ގޮވާލާނެ ލޮބުވެތި ނަމެކެވެ.
ނަފީސާ…
އެހިސާބުން އޭނާގެ އަޅި ދިރިއުޅުމުގައި ކުލަޖެހުނުކަހަލައެވެ. ދިރިއުޅުމަކީ ކިހާ އުފާވެރި އެއްޗެއްކަން އޭނާއަށް އެނގުނެވެ. ނަފީސާއާއި އެކު އޭނާ ދުވަސްތައް ހޭދަކުރަމުން ގެންދިޔައީ އެއްވެސް ވިސްނުމެއް ފިކުރެއްނެތިއެވެ. މަހަކު އެއްފަހަރު ކުރެވެމުންދާ މާލޭގެ އެދަތުރުތަކަށް ރަޝާދު ހުންނަނީ ފެންބޮވައިގަނެފައެވެ. ރަށުގައި އޭނާ ހުންނަނީ ދުވަސްތައް ގުނުމުގައެވެ. އަދި މާލެ އައުމުން އޭނާއަށް ހުރެވެނީ ވަގުތުގެ ހަލުވިމިނާއި މެދު ހައިރާންވެފައެވެ.
ދެމީހުންގެ ލޯބީގެ ދަތުރު ނުފެށިގެން އުޅެނިކޮށް އެލޯބީގެ މީރުވަސް އެންމެނަށް ދުވަން ފަށައިފިއެވެ. އެދެމީހުންގެ އާއިލާއަށް މިކަން ފަޅާއެރުމުން އެމީހުން މިގުޅުމާއި ބެހޭގޮތުން ދެކޭގޮތް އުޑާއި ބިމާހާއި ތަފާތެވެ. ރަޝާދުގެ މައިންބަފައިން މިގުޅުމާއިމެދު ރުހޭއިރު ނަފީސާގެ ބައްޕަ ލަތީފު ދެކޮޅުހަދަމުން ދިޔައެވެ. އޭނާގެ ނުރުހުންތެރިކަމުގެ މިންވަރު ފާޅުކުރުމުން އެދެމީހުންނަށްވެސް ލިބިގެންދިޔައީ ބުނަންވެސް ނޭނގޭވަރުގެ ހައިރާންކަމެކެވެ. އެހެންނަމަވެސް ބައްޕަގެ ހަރުކަށި އަމުރުތަކާއި ދެކޮޅަށް ނަފީސާ، ރަޝާދުއާއި ބައްދަލުކުރަމުން ގެންދިޔައެވެ. ރަޝާދުވެސް އަވަސްއަވަހަށް މާލެއިން ކޮޓަރިއެއް ކުއްޔަށް ހިފައިގެން އެއްކޮށް މާލެ ބަދަލުވެއްޖެއެވެ. ނަފީސާއެކޭ އެއްގޮތަށް އޭނާވެސް އެންމެ ދުވަހެއްވެސް އެކަކު އަނެކަކާއި ބައްދަލު ނުވެ ދާކަށް ބޭނުމެއް ނުވެއެވެ.
ނަފީސާގެ މައިންބަފައިންގެ ފިއްތުންތަކުން ސަލާމަތްވުމަށް ކުރެވޭނީ ހަމައެކަނި އެންމެ ކަމެއްކަން ވިސްނުނު ދުވަހުން ފެށިގެން އެމީހުން ކައިވެނި ކުރަން ނިންމިއެވެ. އެހެންނަމަވެސް ނަފީސާގެ ބައްޕައަށް މިކަން އެނގުމާއެކު އެކަންތަކަށް ހުރަސް އަޅަން މަސައްކަތްކުރިއެވެ. އެންމެފަހުން އެންމެނާއި އިދިކޮޅަށް ނަފީސާ، ރަޝާދުއާއި އިނެވެ. އެއާއެކު އޭނާގެ ބައްޕަގެ ހިތްވަރު އެލުނުކަހަލައެވެ. ހުރި ހަމައެކަނި ދަރިއާއި ގުޅުންކަނޑާލާކަށްލަތީފު ބޭނުމެއްނުވެއެވެ. އެހެންކަމުން އެތައް ވާހަކައެއް ދެއްކުމަށްފަހު އެންމެފަހުން ގޮތްހުސްވެގެން އެމީހުން އެގެއަށް އައުމަށް އާދޭސްކުރަން ފަށައިފިއެވެ.
ބައްޕައަށް އެއްގޮތަކަށްވެސް މާފުނުކުރާން ނިންމައިގެން ހުރި ނަފީސާވެސް ރަޝާދުގެ އެދުމުގެމަތިން އޭނާގެ ގެއަށް އެނބުރި ދިޔައެވެ. އަދި އެމީހުންގެ ދިރިއުޅުން ހަމަޖެހިގެން ކުރިއަށް ގެންދެވޭތޯ މަސައްކަތްކުރެއެވެ.
ދުވަސްތައް މަސްތަކަށް ބަދަލުވެގެން ދާންފަށައިފިއެވެ. ރަޝާދުގެ ހިތުގައި ނަފީސާގެ މައްޗަށް އޮތް ލޯބި ދުވަހެއް ދުވަހަކަށް އިތުރުވަމުން ދިޔައެވެ. އެހެންކަމުން ނަފީސާ ބަނޑުބޮޑުކަން އެނގުމާއެކު އޭނާގެ ހުރިހާ އުއްމީދެއް ފުރިހަމަވި ކަހަލައެވެ. ނަމަވެސް އެ އުފާވެރިކަން ކުޑަ ދުވަސްކޮޅެއްގެ ތެރޭގައި ގެއްލިގެން ދިޔައެވެ.
ނަފީސާ ދެފަހަރު ބަނޑުބޮޑުވެ ކޮންމެ ފަހަރަކުވެސް ދުވަސްނުފުރާ ވިހާ ކުއްޖާ އޮންނަނީ ބަނޑަށް މަރުވެފައިއެވެ. އެކަމުގެ ހިތާމާއިގައި އެތައް އަހަރުތަކެއް ފާއިތުވެގެން ދިޔައެވެ. ނަމަވެސް އެދެމީހުންގެ ގުޅުމަކަށް ގުޑުމެއް ނާރައެވެ. ރަޝާދުގެ ލޯބީގެ ހިޔާވަހިކަމުގައި ނަފީސާ ދުވަސްތައް ގުނަމުން ދިޔައެވެ. އަދި ނަފީސާގެ ލޮލުގައި ހިތާމައިގެ އެންމެ ހިޔަންޏެއްވެސް ދެކޭކަށް ރަޝާދު ބޭނުމެއްނުވެއެވެ.
އެހެންކަމުން ތިންވަނަ ފަހަރަށް ނަފީސާ ބަޑުބޮޑުވުމުން އެމީހުން ނޭވާ ހިފަހައްޓާލައިގެން ތިބެވުނެވެ. ނަމަވެސް އެމީހުންނަށް ލޯބިލޯބި އަންހެއްކުއްޖެއް ލިބުނު ދުވަހަކީ އެމީހުންގެ ދިރިއުޅުން ފުރިހަމަވީ ދުވަސްކަމުގައި ބެލެވުނެވެ. އަދި އެލިބުނު ނިއުމަތަށް ޝުކުރުކުރަމުން ދިރިއުޅުމުގެ އުފާވެރިކަމާއި ހިތްހަމަޖެހުމުގައި އެމީހުން ދުވަސްތައް ހޭދަކުރަންފަށައިފިއެވެ.
16 އަހަރުގެ ފުރިހަމަ ދިރިއުޅުމެއް އުޅުމަށްފަހު އެއާއިލާއަށް ހިތާމައިގެ ހިޔަނި އެޅުނީ ކާކުގެ އެސްފިނާއަކުން ކަމެއް ނޭނގެއެވެ.
—
ޚިޔާލުތައް މިހިސާބަށް ދިޔުމާއެކު ރަޝާދަށްތެޅިގަނެވުނެވެ. ދެން އިތުރަށް ވިސްނާކަށް އޭނާ ބޭނުމެއްނުވިއެވެ. ކުރީގެ ހަނދާންތަކާއި ދުރުވެލަމުން ރަޝާދު ފުރޮޅިލިއެވެ.
އާއެކެވެ. ލުބްނާއަކީ ކުރީގެ އެފެނުނު އުފާވެރި ހިތްހެޔޮ މިޒާޖުގެ ކުއްޖާއެއް ނޫނެވެ. އޭނާއަށް އައިސްފައިވާ އެބަދަލު ފެންނަ ކޮންމެ ފަހަރަކު ރަޝާދުގެ ހިތުން ލޭއޮހޮރިގެން ދެއެވެ. އޭނާގެ ދިރިއުޅުން ވީރާނާވެފައިއެވަނީ ރަޝާދުގެވެސް އިހުމާލުންކަން އޭނާ ގަބޫލުކުރެއެވެ. އެހެންކަމުން ލުބްނާގެ ދިރިއުޅުން ހަމަމަގަށް ގެންނަން އޭނާއަށް ކުރެވެން ހުރިހާ ކަމެއްކުރާނެއެވެ.
އެޚިޔާލު އައުމާއެކު އޭނާއަށް ސައިފްގެ ހަނދާންވެގެންދިޔައެވެ. އެހުރިހާ ދުވަހަކު ލުބްނާގެ ނުރުހުންތެރިކަން ދައްކަމުން ދިޔަނަމަވެސް ސައިފަށް އޭގެ އަސަރު ނުކުރާ ކަހަލައެވެ. ހުސްނާ ފަދައިން އޭނާގެ އެއުފަލުގައި ލުބްނާވެސް ބައިވެރިކުރުވަން އޭނާ މަސައްކަތްކުރަމުން ދެއެވެ. ސައިފް ގެ އެއުފާވެރި މިޒާޖާއި އެޒުވާންކަމުގެ މަސްތުން ފުރިފައިވާ ހުނުމުގެ އަޑު އަބަދުމެ އިވޭކަމަށްވަންޏާ ލުބްނާގެ ހިތަށް އޭގެއަސަރު ނުކޮށް ހުރެދާނެ ހެއްޔެވެ؟
ރަޝާދު ވިސްނާލިއެވެ. ލުބްނާގެ ގެއްލިގެންދިޔަ އުފާވެރި ދިރިއުޅުން އަނބުރާ ހޯދައިދިނުމަކީ ރަޝާދުއަށް ކޮށްދެވިދާނެ ކަމެކެވެ. އޭނާގެ ހަމައެކަނި އެދުމަކީ އެއީއެވެ. ލުބްނާ ހިނިތުންވެލާތަން ބަލާލުމެވެ. އުފާވެފައި ހުއްޓައި ފެނުމެވެ.
—-
